Thursday, October 26, 2017

ගෑනු ළමයා හා රොටියාගේ දත

යන්තන් දැලි රැවුල ආපු දවසේ හිටං ම (කොහොමද ඒක) රොටියා ඇඟිලි ගැන ගැන උන්නේ තමන්ටම කියා මහ බඹා මැව්වාය කියන ස්ත්‍රී රත්නය මුණගැසෙන තුරුය. රොටියා අසා තිබූ හැටියට ඈ හා රොටියාගේ ගතිගුණ රුචි අරුචි කම් නුලටම ගැලපෙනවාය. ඈ රොටියාව දෙවියා ලෙස අදහාගෙන ඉන්නවාය. රොටියා ඈව මල්පෙත්තක් සේ රකින්නේය. අවුරුදු ගානක්ම දත කාගෙන සෙව්වත් ඈ මුණ නොගැසුණු විට රොටියා හිතා උන්නේ මැරෙනකම්ම තනියම ඉන්න වේවි කියාය. ඔය අස්සේ රොටියාගේ ජිවිතයට ගෑනු ළමයා පැමිණි පසු පෙර කී සියලුම දේ මඥ්ඥන් කවිකාරයන් කට කසනවාට කී හරුපයන් බව රොටියාට ඉත්තේරුවෙන්ම තේරුම් ගියේය. දොට්ට පිලට යතත් එකට යන්න ඕනෑ වෙන සුනිමල ජෝඩු ඉන්නේ මල් කතා පිටු අස්සේ පමණමය.
රොටියා නිලටය - ගෑනු ළමයා රනිල්ටය
රොටියාට තුං වේලම උනත් ඉඳි ආප්ප කත හැක - ගෑනු ළමයාට එහෙම නැත.
රොටියා නුවරඑළියේ යමුය කී විට ගෑනු ළමයා යාපනයේ හෝටල් බුක් කරන්නීය.
ගෑනු ළමයා කෙට්ටුවෙන්නට බඩගින්නේ ඉද්දි රොටියා සිය බඩ ගෝලාකාරව පවත්වාගෙන යනු වස් දිනකට පස් වේලක් වත් කන්නේය
.
.
.
රොටියා වෙදමහත්තයාගේ දත් බෙහෙත් වලින් දත් මදින විට ගෑනු ළමයා මදින්නේ සෙ යන්නෙන් පටන් ගන්නා (නැත්නං මේක දත් බෙහෙත් දැන්වීමක් වීමට ඉඩ ඇත්තේය) දත් බෙහෙත් වර්ගයකින්ය.

ඔය මුලින් කී අටෝරාසියක් දේවල් ඕනෑ කෙහෙල් මලක් උනාට පස්සෙන් තියෙන කාරණය නං රොටියාට දවසට දෙපාර ගානේ සෑහෙනට වද දුන්නේය. රොටියා හැමදාම ඔය 'සෙ' යන්නෙන් පටන් ගන්නා සංවේදී දත් වලට යයි කියාගන්නා මිල අධික දත් බෙහෙත පාවිච්චි කිරීමේ ආදීනව ගෑනු ළමයාට පැහැදිලි කරන්නට යෙදුනත් කණකට ගත්තේ ඈ නොවේය.

මෙතැන් සිට ගෑනු ළමයාගේ දත් බෙහෙත හාවා ලෙසත් රොටියාගේ දත් බෙහෙත නරියා ලෙසත් හඳුන්වන්නේ ලිවීමේ පහසුව තකාය

රොටියා- මේවයින් මදින්න හොඳ නෑ. කාලයක් යද්දී දත් හිරිවැටෙන්න ගන්නවා.
ගෑනු ළමයා- ඔයාගේ විකාර
රොටියා- විකාර නෙමෙයි ඇත්ත. බලන්න නරිය එහෙමද? පාට උනත්.. ඒක හදන්නේ සිංහල බෙහෙත් දාල
ගෑනු ළමයා- පාට නං මොනා කරන්න බැයිද
රොටියා- ඒකේ රස උනත් බලන්න
ගෑනු ළමයා- හයියෝ.. අපේ ඔෆිස් එකේ ෆුඩ් ඇන්ඩ් නියුට්‍රිෂන් සෙෂන් එකක් තිබ්බා. ඒකට ආපු කෙනෙක් කිව්වා ඕනෙම ෆ්ලෙවර් එකක් අර්ටිෆිෂල් තියෙනවා කියලා.
රොටියා- දැන් බලන්න හාවාගේ ගානම.
ගෑනු ළමයා- මේ රොටියෝ.. ටුත් පේස්ට් කන්දක් දාගෙන පැය ගානක් දත් මදින්නේ ඔයා. ඔයා නරියගෙන් මදින්න මම හාවාගෙන් මදින්නන්.

ගෑනු ළමයා දුන්නේ සරල විසඳුමකි. නමුත් රොටියා දැඩිව අධිෂ්ඨාන කරගෙන උන්නේ ගෑනු ළමයාටත් නරියාගෙන් දත් මදින්න පුරුදු කරන්නටය.අවසානයේ දවසට දෙපාරක් ඇසෙන රොටියාගේ කන්දොස් කිරියාව මල කරදරයක් බව ගෑනු ළමයා විසින් රොටියාට රතු නිවේදනයක්ද නිකුත් කරන්නට යෙදුන නමුත් රොටියා දැඩිව කියා සිටියේ තමුන්ගේ මල කන්දොස්කිරියාව නවත්තන්නට අවැසි නං හාවා ඉවර වූ පසු නරියාව ගෙදර ගෙනෙන ලෙසය.

අවසානයේ ගෑනු ළමයා පරාජය බාර ගත්තේ මෙසේ කියමින්ය
"රොටියෝ , ඔන්න මම නොකිව්වයි කියන්න එපා. බඳින්න කලින් ඔයා දත් දෙකක් ගැලෙව්වා, එකක නර්ව් ෆිලින් එකක් කළා. මතකනේ ඒ දවස් වල කට බදන් කෑ ගහපු හැටි"

රොටියා:" පිස්සුද, ඒ සැරට"
ගෑනු ළමයා:"මොන සැරක්ද, ඒ දවස් වල අර කෙහෙල් මලෙන් නේ මැද්දේ. අනික බඳින කොට ඔයා රෑට දත් මදින්න පුරුදු වෙලා හිටිය එකක් ද"

අවසානයේ තමා දැන් දිනපතා උදේ සවස දෙවරක් දත් මදින සිරිමත් මගේ සකි මෙන් යහපත් ළමයෙක් බවත්, නරියාගෙන් එක දවසක් මැද්දොත් ගෑනු ළමයා හැමදාම නරියාම ඉල්ලන බව ඉර හඳ මෙන් විස්වාස බවත් පැවසූ රොටියා සුබ මොහොතින් සුපිරි මාර්කැට්ටුවට ගොස් නරියෙකු රැගෙන ආවේය.

නරියා තමන්ගේ වැඩ කිඩ පෙන්නන්න එපමණ කාලයක් ගත කලේ නැත.

දෙවැනි දවසේ රොටියාගේ වම කම්මුලේ හිරි වැටීමක් දැනුනේය
සිව්වැනි දවසේ දකුණු හක්කේ සොයා ගත නොහැකි දතක හිරි වැටීමක් දැනුනේය
පළමු සතිය අවසාන වන විට දත් ඇන්ද රොටියාව සහමුලින්ම නොසලකා හැර තමුන්ට උවමනා උවමනා විදියට හැසිරෙන්න පටන් ගෙන තිබුනේය

නරියාව ගෙනවිත් සති දෙකක් ගෙවෙන අද, රොටියා විසින් මේ ලිපිය ලියන්නේ එක දතක් සාක්කුවේ දමාගෙනය

Thursday, August 17, 2017

ඩාඩියාගේ ලෝකය -04

ඩාඩියාගේ ලෝකය -01
ඩාඩියාගේ ලෝකය -02
ඩාඩියාගේ ලෝකය -03

තමා ඇසු දෙයින් කම්පනයට පත් ඩාඩියාට මද වෙලාවක් ගතවන තුරු වචන අමතක උනේය. ආගන්තුක තරුණයා ඈ දෙස සමච්චලය මිශ්‍රිත සිනාවක් ඇතුව බලා උන්නේය.

"මොනවා.. ඈට පුතෙක් ඉන්නවාද" ඩාඩියාගේ ස්වරය කම්පනය වන සුළු විය.

"ඔව්.. ඈ පුතුන් දෙදෙනෙකුට රහසේම උපත දුන්නා. එයින් කෙනෙක් ලාබාල වයසේදීම පියා විසින් රැගෙන යනු ලැබුවා. ඈ සමග ඉතුරු උනේ මා පමණයි. ඈ පුතුන් දෙදෙනෙකු හදා වඩා ගත්තේ විශාල අවධානමක් අරගෙනයි"

"එතකොට ඔබේ පියා.."

"එය රහසක්. මට ඔහුගේ මුහුණ යන්තමින් මතකයි. මා දන්නා එකම දෙය මගේ මවට ඔහු සමග යාමට නොහැකි බවයි. ප්‍රධාන නළගන ධූරය සමගම ඈට පූජකයන් විසින් ලබා දුන් කිසියම් බෙහෙතක් නිසා ඈට නයිල් නදියේ ජලය හැරෙන්නට වෙන කිසිම තැනක ජලය පානය කරන්නට බැහැ. එය කරුමයක්"

"මොකද්ද කරුමය කියන්නේ" ඩාඩියා ඒ වදන ඇසුවේ ජිවිතයේ පළමු වතාවටය.

තරුණයා හිනැහුණේ වරද සහගත ලෙසය. "මගේ මුළු ජිවිතයම ගෙවෙන්නේ මේ බිම්මහලේ නිසා මට හුඟාක් කාලය තියෙනවා. මම රෙදි වියනවා. ඉතුරු කාලයේදී පොත් කියවනවා. අපිට ඉතා ඈත ජම්බුද්වීපය නම් රට බුද්ධ නම් කෙනෙකුගේ ඉගැන්වීම් වලට මම ඉතා ප්‍රියයි. කර්මය ඔහුගේ ඉගැන්වීමක්"

ඩාඩියා නිසල විලක් බඳු තරුණයාගේ කළුපැහැ දෙනෙත් දෙස බලාගෙන උන්නාය. තම ජිවිතයේ හැම දෙයක්ම පාලනය කරන්නට පැමිණෙන පූජකයන්ගෙන් මිදී ජම්බුද්වීපය නම් රටට ගොස් මේ තරුණයා සමග වාසය කරන්නට හදිසියේම ඈට ආසාවක් පහල උනේය.

**************************

සෑහෙන වෙලාවක් තිබූ කලබලය නිමවී නර්තන ගෘහය යලිත් සාමකාමී වූයේ ආගන් නික්ම යෑමෙන් ඉක්බිතිවය. නර්තන ගෘහයේ සියල්ලෝම පෙලට සිටුවා නිරුවත් කරන්නට ආගන් ලබා දුන් නියෝගයට සිසිලියාට පෙර පාරාවෝ රැජිණ විරුද්ධ වූවාය.

"ආගන්, ඔබ තිස් නව වසරක් පුරා දෙවියන්ට සේවය කරත් දේව කැමැත්ත ඉගෙන ගෙන නැද්ද? එවැනි දෙයක් සිදු කරනවා නම් දෙවියන් , දේව පුත්‍රයින්, රජතුමා අනිවාර්යෙන්ම සහබාගි වෙන්න ඕනෑ. කන්‍යාවියන් පුරා දවස් තිස් දෙකක් පුජාවන්හි යෙදෙන්නට ඕනෑ. සිසිලියා විසින් අධිගෘහිත පුජාව තබන්න ඕනෑ. ඔබ ඔය කතා කරන්නේ හොඳ සිහියෙන්ද"

තමාට පෙර ප්‍රධාන පූජක ධූරයේ හුන් 'අහ්මෙට්' නම් පුජකයාට බෙහෙවින්ම වැදුම් පිදුම් කලේ පාරාවෝ රැජිනය. ඔහු වෙනුවෙන් සතියකට වරක් පළමු පෙලේ නර්තන සැන්දෑවන් සංවිධානය කලේද රැජිනමය. ඔහුට රති පූජාවන් සංවිධානය කලේද ඈමය. අවසානයේ ඊජිප්තුවේ සෞභාග්‍ය පතා ඔහුට හළාහල පුජාවක් සංවිධානය කලේද මේ රැජිනමය.

වහලෙකු කසයට බියෙන් වැඩ කරන්නනේ යම් සේද , බෙහෙවින් රතුව හුන් අහ්මෙට් තමාගේ අවසාන පුජාව සිද්ද කලේ ද එලෙසමය. හළාහල පුජාවේදී පුජකවරුන්ට ලබා දෙන්නේ සාමාන්‍ය මිනිසුන්ට ලබාදෙන විෂට වඩා වෙනස් විෂ වර්ගයක්ය. පුරාණයේ සිට පැවත එන පරිදි ඉක්මණින් මරණයට පත් වෙන්නාට තමාගේ මරණින් පසු ජිවිතයට සුදානම් වීමට කාලයක් නැත. එනිසා ඔහුගේ මරණින් මතු ජීවිතය වේදනාකාරිය. එනිසා හළාහල පුජාවේදී පුජකයන්ට ලබා දෙන්නේ ඉතා සෙමෙන් ක්‍රියාත්මක වන සහ සිරුර මමිකරණයට පහසු වන විෂ වර්ගයකි. මරණින් මතු ජීවිතය වාසනාවන්ත වීම කෙසේ වෙතත් අහ්මෙට් දින තුනක් පුරා නොවිදිනා දුක් වින්දේය. වස පානය කිරීමෙන් අනතුරුව පැය දොළහක් ඔහු විසින් ඉතා ස්ත්‍රෝත්‍ර කියවන්නට යෙදුනද ඉන් අනතුරුව ඔහුගේ කටහඬ පැටලුන සැටිත්, සිරුර පුරා ලේ ගඩු මතුවී පුපුරා ගිය හැටිත් , ඔහුගේ මර ලතෝනිය අස්සේම පිරමිඩය වසා දැමූ හැටිත්, අනතුරුව තමා තවමත් ජිවත් වන බව අඟවන සීනුව ඔහු විසින් නොකඩවා හඬවන්නට පටන් ගත් නිසා පුජකවරු රහසේම සීනුවේ හඬ අඩු කල සැටිත්, සිව්වන දිනයේ ඔහුගේ සිරුර දෙවියන්ට බාර කිරීම පිණිස (මමිකරණය) පිරමිඩය තුලට යනවිට ලේ ගඩු පුපුරා තිබූ ඔහුගේ මෘත දේහයත් ආගන්ට හොදින් මතක තිබූ නිසා හෙතෙම ව්‍යාජ සිනාවක් පා රැජිනගෙන් බැගෑපත්ව සමාව ඉල්ලා ඉක්මණින් පිටව ගියේය.

************************

"ඔබ ඉතා ලස්සනයි" තරුණයා හිටිහැටියේම ඩාඩියාට පැවසුවේය.

ඩාඩියා රතු වූවාය. ඇගේ හැසිරීම තරුණයාට ගෙන ආවේ ආගන්තුක මිහිරකි.

හදිසියේම දිගු ශාලාවේ අඳුරු කෙලවර ආලෝකයක් මතුවිය. මොහොතකින් එතැනට පැමිණියේ සිසිලියාය.සිය පුතා ඩාඩියා සමග සල්ලාපයේ යෙදෙන අයුරු දුටු ඈ යන්තමින් සිනා වූවාය.

"විමන්සට මිතුරියක් ලැබී ඇති හැඩයි" ඈ පළමුව කතා කලේ සිය පුත්‍රයාටය.

ඩාඩියා එවැනි නමක් ඇසුවේ පළමු වතාවටය.එය ඈට ඇසුනේ සංගීතයක් ලෙසය.

"ඈ හොඳටම බිය වෙලා උන්නේ අම්මා. මට ඈට කැමැත්තක් ඇතිවුණු නිසා කතා කරන්නට සිතුනා"

"ඒක හොඳයි. කොහොමත් ඈට ටික දිනක් මෙහිම ඉන්න වෙනවා. ඈ ඉන්න තැන දැන ගත යුත්තේ අප දෙදෙනා සහ හීලියා පමණයි"

"හීලියා.. ඒ තක්කඩි කෙල්ල රහස රකිවිද අම්මා"

"මට ඔබට වඩා ඈව විස්වාසයි" සිසිලියා සිය පුත්‍රයාට කතා කලේ හුරතලයෙනි. අනතුරුව ඈ ඩාඩියා දෙසට හැරුණාය.

"සැඟවෙන්න හැදුවාට ඔබවම ඔහු දැකපු අයුරු හරි පුදුමයි නේද. ඔහුට පුදුමාකාර ඉවක් තියෙනවා ඔහුගෙන් සැඟවෙන අයව සොයාගන්න"

ඩාඩියා හිස පහත් කර ගත්තාය. සිසිලියාට ඈ ගැන කණගාටුවක් ඇතිවුනේය.

"ඔබ පැමිණි දා ඉඳල මට ඔබව විශේෂයි. බොහෝ කෙල්ලන් ආගන් ගේ පහස සලකන්නේ ගෞරවයක් හැටියටයි. මීට පෙර මම කෙල්ලන් තුන් දෙනෙක් ඔහුගෙන් ගලවා ගත්තා. ඔවුන් තුන් දෙනාම දැන් ඉතා හොර රහසේ නමුත් සතුටින් ජිවත් වෙනවා"

"ඔබතුමියගේ කරුණාව ට දෙවියන්ගේ ආශිර්වාදය ලැබේවා" ඩාඩියා තෙපලුවේ සිහින් ස්වරයෙනි.

"ඔබට මෙහිම කුටියක් මම පෙන්වන්නම්. මම අනෙක් අයට කියන්නේ ඔබව "සෙත්" දෙවියන් කැඳවා ඇති බවයි. එවිට ඔවුන් නිහඬ වේවි"

ඩාඩියා හිස සැලුවාය.

කලබල වලට අධිපති වූ නිසාම ඊජිප්තුවේ සියල්ලෝම 'සෙත්' දෙවියන් ගේ බැල්මෙන් සැඟවී සිටීමට බොහෝ සෙයින් වෑයම් කළහ. යමෙකුට 'සෙත්' ගේ බැල්ම වැටි ඇත්නම්, ඒ තැනැත්තා ගැන කතා කළහොත් 'සෙත් ' ඊළඟට තමුන් පසුපස පැමිණෙන බව පුරාණයේ සිටම ඊජිප්තුවේ පැවති විශ්වාසයකි.


මීළඟ කොටසට...


Monday, May 22, 2017

ඩාඩියාගේ ලෝකය -03

ඩාඩියාගේ ලෝකය -01
ඩාඩියාගේ ලෝකය -02

වරක් දුටු විට නැවත බලන්නට සිත්වෙන, ඔලිව් පැහැති දෙනෙත තුල කිමිදුනු ආගන් කෑදර සිනහවකින් මුව සරසාගෙන නැවත නර්ථනය දෙසට හැරුණේය. ගනකම මුව වැස්මකින් වැසී තිබුණු හෙයින් ඇගේ මුහුණේ හැඩරුව නොදුටුවද ඇගේ උස පළල සියල්ලම ආගන්ට නිවැරදිවම මතකය.

අනෙක් අතට වසර ගණනක් පුරාවටම ප්‍රධාන නළගන නිළය හොබවන සිසිලියා ට තිබුනේද තීක්ෂණ දෙනෙතක් මෙන්ම ආගන්ට නොදෙවෙනි විචාර බුද්ධියකි. ඇගේ නොකැළැල් සමෙහි වූ රහස, පන් සාලිස් වසරක් වුවද ඈ තවමත් විසි වයස් මෙන් පෙනුම දෙන රහස, රූමත් යුවතියන් පීරී පවතින නළගන ගෘහය මේ සා විධිමත්මව පවත්වා ගෙන යාමේ රහස මෙන්ම ඇගේ යටි සිතේ ඇතුල් පැත්තේ ආගන් පිළිබඳව තිබූ කැකෑරෙන වයිරය ද අනෙක් අයට රහසක්ම විය. කොපමණ දක්ෂ නිලියක් වුවද ඈ තුල ආගන් කෙරෙහි ඇති අකමැත්ත සියල්ලෝම දැන සිටි අතර, කවුරුත් නොදන්නා යම් හේතුවක් නිසා ආගන්ද සිසිලියාට පිළිකුල මිශ්‍ර බියක් දැක්වූයේය. ඉහල සමාජයේ පාරාවෝ රැජිණ හැරෙන්නට අනෙක් සියලුම දෙනා ආගන්ට අකමැති වූ නිසා සිසිලියාගේ අකමැත්ත සාමාන්‍ය දෙයක් ලෙස සියල්ලෝම බාරගෙන සිටියහ.

නර්ථනය අවසානයේ හිත් ඇදගන්නා කෙල්ලක දුටු සෑම විටෙකම සිදු කරන නාට්‍යාකාර රංගනය සිදු කරමින් ආගන් ඩාඩියා ඉඳ උන් පැත්තට හැරුණේය. ඒ ක්ෂණයකින් තමාට කොතැන හෝ වැරදුන බව ඔහුට තේරුම් ගියේය. දහස් ගණන් කන්‍යාවියන් ඇසුරු කර තිබූ ආගන්ට ඇඳුම් පැළදුම් එකම වුවාට මේ ඉන්නේ වෙනත් එකියක්ය යන්න දැන ගැනීමට අවැසි වුයේ එක බැල්මක් පමණකි.

***********************

සාමාන්‍ය නාටිකාවන්ට ඇතුල් වීමට තහනම් කලාපයේ කුඩා කුටියක ඩාඩියා උක්කුටියෙන් ඉඳගෙන ගැහෙමින් උන්නේ සීතලට නොවේය. ආගන්ගේ රුදුරු දෑතින් නූලෙන් ගැලවුණු සිය ජීවිතය ගැන ඈ උන්නේ විස්මයට පත්වය. රංගනය පටන් ගත් පසු රංග ශාලාවෙන් පිටවීමට කිසිවෙකුට තහනම්ය. එසේවුවහොත් රංගනයේ යෙදෙන නාට්‍යංගනාවන්ට වසර පහක් යනතුරු දෙවියන්ගේ බැල්ම නොලැබෙන බවට ගෘහයේ සියල්ලෝම ඒකමතිකව පිළිගෙන උන්නෝය. එනිසා මෙවැනි නර්තන සැන්දෑවන්හිදී සිසිලියා නාට්‍ය ශාලාව පුරා සීනු පද්ධති සක්‍රීය කරන්නීය. එවිට යමෙක් ශාලාවෙන් පිටවෙන්න තැත් කරන විට මහ හඬින් සීනුවක් නාද වන්නේය. ඒ සීනු පද්ධතිය ඉතා ඈත පාරදීසියක වෙසෙන රාවණා නම් ඉතා කඩවසම් රජ කෙනෙකුගෙන් සිසිලියා ලද තිළිණයක් බව ඩාඩියා දැන උන්නේ හිලියාගේ ඕපාදුප නිසාය

ඊජිප්තුවෙන් සොයාගත් අනුනාකි අභ්‍යවකාශ යානාවේ රූ සටහන. මහා රාවණා රජතුමාගේ දඬුමොණර යන්ත්‍රයද මෙයට සමානය

ඩාඩියා විසින් තමා මොහොතකින් ආගන්ට හසුවන බව සක්සුදක් සේ වටහාගෙන ඉන්නා විටය හීලියා පැමිණියේ. පසු පෙලෙහිම වාඩි වී උන් ඩාඩියාව සිසිලියාගේ නියෝගයකට අනුව බව පවසමින්, කිසිවෙකුට නොපෙනී හීලියා විසින් කැඳවාගෙන ගිය අතර මොහොතකින් ඈ උන්නේ රහස් උමගකය. ඩාඩියාගේ ඇඟලුම් ක්ෂනිකයකින් උනාගත් හීලියා ඈට උමගේ පසෙකින් තිබූ මේ කුටියේ සිටින ලෙස දන්වා අතුරුදහන් වූවාය. සිදුවූ කිසිම දෙයක් පිළිබඳව පැහැදිලි වැටහීමකින් තොරව ඈ අතිශය බියටත් තොන්තුවටත් පත්ව උන්නාය.

තමා දෙස කිසිවෙක් බලන් ඉන්නේය යන ගුප්ත හැඟීමකින් හිස ඔසවා බැලූ ඩාඩියා දුටුවේ තමුන් ඉදිරිපිට තිබූ කහපැහැති ලෝගුවය. ඈ වහා එය රැගෙන වතට දමා ගත්තාය. මොහොතකින් අඳුරෙන් මතුවූයේ තරුණයෙකි. ඔහු උස්ය. තද දුඹුරු පැහැතිය. කඩවසම්ය. පිරිමි පුළුටක් නැති නළගන ගෘහයේ උන් තරුණයා දුටු ඩාඩියා විස්මයට පත්ව මුව විවර කලද තරුණයා වහා අත පා එය වැලකීය.

"මේ සැරේ කවුරු හින්දද" ඔහුගේ කටහඬේ රැඳී තිබුණේ කෝපයක් නොව උපහාසයකි

ඩාඩියා විස්මයට පත් දෙනෙතින් ඔහු දෙස බැලුවාය.

"පුදුම වෙන්න කාරණාවක් නෑ. ඉඳල හිටලා ඔයවගේ දේවල් මෙතැන සිද්ද වෙනවා. හැබැයි එහෙම වෙන්න ඔබ සිසිලියාගේ ප්‍රියතමයෙක් වෙන්න ඕනෑ" තරුණයා ඇසුවේ ප්‍රශ්නයකි.

"නෑ එහෙම දෙයක් නෑ. මම තුන්වෙනි පංතියේ නාට්‍යංගනාවක්" ඩාඩියා පැවසුවේ සෙමිනි. සිය සොහොයුරියන් අතරින් තමා සිය මවගේවත් ප්‍රියතමයා නොවූ බව ඈ තරුණයාට පැවසුවේ නැත.

"ඔය වගේ ඇස් දෙකක් තියාගෙන"

ඩාඩියා සිය දෙනෙත වසා ගත්තේ මුහුණ පුරා ලා රතක් ඉහිරී යද්දීය.

"ඔබ හරිම ලස්සනයි. ඇයි ඔබ අද තරඟ නොකරන්නේ"

"මා තෝරාගත්තේ තෙවෙනි පන්තියයි. මට වඩා ලස්සන, දක්ෂ අය බොහෝම දෙනෙක් මෙතැන ඉන්නවා"

"එහෙනම් සිසිලියා ඔබට කැමති වීම පුදුමයක් නෙවෙයි"

***********************

ආගන් උන්නේ කෝප වූ කොටියෙකු ලෙසය. ඔලිව් පැහැති දෑසේ හිමිකාරිය සොයාගෙන ඈව මේ පිරිස මැද නිරුවත් කර ප්‍රසිද්දියේ දුෂණය කරන්නට හටගත් වියරු ආශාවෙන් ඔහු දැවෙමින් උන්නේය. ශාලාවේ උන් කිසිම කෙනෙකුට හඩක් නොනැගෙන සේ මෙයින් පිටවිය නොහැකි බව සිසිලියා විසින් ඔහුට ඔප්පු කර පෙන්වා තිබුණාය. ඔලිව් පැහැති දෑස දුටු තැන දැන් උන්නේ කළු පැහැති දෑසක් ඇති යුවතියකි. පාරාවෝ රැජිණගේ අදහස වුයේ ආගන් දැක ඇත්තේ මරණයට අධිපති ඔසිරිස් දෙවඟන බවයි.

"ඈ පැමිණෙන්න ඇත්තේ ඔබේ මරණින් මතු ජීවිතය වාසනාවන්ත බව පෙන්වන්නයි" ඕ ආගන්ට පැවසුවාය. සිසිලියා හැඟීමක් නැති මුහුණකින් බලාගෙන උන්නාය.

තමා දුටුවේ ඔසිරිස් නොවන බව ආගන්ට දිවුරන්නට පුළුවන් කම තිබුනේය.

***********************
"ඔබ කව්ද" ඩාඩියා විමසුවේ ආගන්තුක තරුනයාගෙනි.

"මම සිසිලියාගේ එකම පුතා"

~ ඊළඟ කොටසට


Thursday, May 18, 2017

රොටියාගේ ගෑනු ළමයා සහ ප්‍රීති වෙසක්!

අලුත් අවුරුද්ද ගෙවෙනවාත් සමගම රොටියාගේ ගෑනු ළමයා බූල් බා කහඹිලියා ඉලූ චිම්පසියා මෙන් එහාට මෙහාට පනිමින් නොසන්සුන් වීම අතිශය ස්වාබාවිකය. කාන්තා ජීවියෙකු සමග ජිවත් වීමේදී ඔවුන්ගේ විවිදාකාරි නුහුගුණ හැසිරීම් පත්තියම් කරගැනීමට මෙන්ම ඒවා විකේතනය කරගැනීමටද හැකියාව පුරුෂ ජීවියා සතු විය යුතුය. ඔවුන්ට උත්තම පුරුෂ කියන්නේ අන්න ඒ නිසාය.

රොටියාගේ ගෑනු ළමයා වැඩ ඇරී නිවසට පැමිණීමෙන් පසුව කුස්සියට නොගොස් සෝපාවේ දිගෑදී පොතක් කියවන්නට පටන් ගනියි නම් ඒ කියන්නේ උදෑසන කෑම පිසූ බාජන සේදිය යුත්තේ රොටියා බවය. ඈ අධික ශබ්දයක් නැගෙන සේ වැඩවල නිරත වන්නී නම් රොටියාට ස්වීප් එක ඇදෙන්න ළඟය. උදෑසන මුලින්ම බල්ලාගේ කෑම එක ලිපේ තියා නැත්තන් ඒ කියන්නේ එදාට බල්ලාට කන්න දිය යුත්තේ බලු විස්කෝතු බවය.බල්ලාගේ කෑම ගැන කියතොත්, ඌට කන්න දෙන එක වෙනම ප්‍රොජෙක්ට් එකක් වන්නේය. ඌ ෆුඩ් සිටියේ මාළු කන්නේ නැත. ඒ නිසා දෙසතියකට වරක් සෙනසුරාදා පාන්දරින්ම වැල්ලට ගොස් ඌට මාළු ගෙන ආ යුතුය. එයිනුත් ඌ සාලයෝ හෝ සුඩයෝ කන්නේ නැත. මාළුන්ට පරාණ බය ගෑනු ළමයා (ගෑනු ළමයා බය එකම සතා මාළුවාය. ඈ කැරපොත්තන් ගෙන රොටියාගේ ඇඟට විසි කරන්නීය) පැත්තකටවත් නොඑන නිසා මාළු සුද්ද කොට පැකට් කිරීම රොටියා සතු කාරියක් වනවාය. එසේ සාදන මාළු පැකට් එකකට හාල් හුන්ඩු දෙකක් දමා බල්ලාගේ කෑම හැදිය යුත්තේ ගෑනු ළමයාය. මොන මායම් දමා ඉව්වත් ඌ රොටියා ඉව්ව දාට බත් ඇටයක් කට ලඟට නොගන්නා නිසා ගෑනු ළමයා ඉස්ට්‍රයික් දවසට ඌට දෙන්න වෙන්නේ බලු විස්කෝතු පමණමය.

මේ බල්ලාත් අර මැක්කා වගේමය. ඕනෑම වැදගත් තැනක මැද්දට පැන ගන්නා ඌ ඊළඟට එතන අරක් අරගනී. මේ පොස්ට් එකටත් සිද්ද වෙන්න යන්නේ ඒකය.

කොහොමින් කොහොමින් හරි ඔය කියන ගෑනු ළමයාගේ නුහුගුණ ගතියට හේතුව වෙසක් සමය අත ලඟට පැමිණීම බව රොටියාට ඉත්තේරුවෙන්ම තේරුණේය. එනිසා දැඩි ඉල්ලීම් උද්ඝෝෂණ පටන් ගැනීමට පෙර මේ වෙසක් එකට ගිය වෙසක් එකට වගේ පැටව් කූඩු සාදා දිය නොහැකි බවත්, මේ කුතුහල බහුල තඩි බලු දණ්ඩා එක්ක වෙසක් කූඩු ඇලවීමට පටන් ගැනීම ලෙල්ලම් වෙන වැඩක් බව ගෑනු ළමයාට පැහැදිලි කරන්නට යෙදුනු අතර , සාකච්චා වාර කිහිපයකට පසුව බලුවා විසින් පරලෝ සැපත් කර තිබූ ගෑනු ළමයාගේ ප්‍රියතම කතා පොත දුටු දිනේ ඇගේ නුවණ පහල වූවාය.

ගෑනු ළමයා: (බලු කෙළ වලින් පෙඟුණු පොත් කෑලි අහුලා බලමින්) දැන් ඒ කියන්නේ ඔයාට වෙසක් කූඩු හදන්න තේරෙන්නේ නෑ. අටපට්ටමක් බැයි නං තරුවක් අලෝමු

රොටියා: මං එකට දහයක් හදල දෙන්නං. මූත් එක්ක කොහොමද කරන්නේ

බලු දණ්ඩා: (තමාට සැපීමට තව යමක් ඇත්දැයි විමසිල්ලෙන් බලයි)

ගෑනු ළමයා: මූව අම්මලාගේ ගෙදර ගිහිං දාමු

රොටියා: මූට හිට් එක. එහෙ සල්ලාල බල්ලෝ තුං දෙනෙක්ම ඉන්නවා. මට නං බෑ වල් බලු පැටව් හදන්න.

බලු දණ්ඩා: (ගෑනු ළමයාගේ සපත්තුවක් උස්සගෙන දෙපැත්තට වනයි)

ගෑනු ළමයා: අනේ රොටියෝ මූට කියන්නකෝ මගේ සපත්තුව තියන්න කියලා. එහෙනං ඔයා මට කූඩුවක් අරන් දෙනවද.

අවසානයේ කූඩුවක් හා බකට් පැකට් එකක් අරන් දීමට පොරොන්දු වීමෙන් පසු ගෑනු ළමයාව සංසුන් කිරීමට රොටියාට හැකි උනේය. මෙයින් තදබල ලෙස අපේක්ෂා භංගත්වයට පත් බලු දණ්ඩා නගුට වකගසාගෙන ඇඳට පැන මුණ හංගා ගත්තේ රැය පහන් වෙන තුරු නොනැගිටින අධිෂ්ඨානය ඇතිවය.

රොටියාට සිය පොරොන්දුව ඉෂ්ට කරන්න ලැබුනේ වෙසක් දවසේ හැන්දෑවේය. ඒ වන විටත් ගෑනු ළමයා රතු එලි එකක් නොව කිහිපයක්ම දල්වා තිබුණාය

ගෑනු ළමයාගේ මන දොළ සපුරන්න , ඈව මිගොමුවේ රේල් පාර අයිනේ තිබුණු වෙසක් කූඩු කඩයකට කැඳවාගෙන ගොස් ඈට කැමති දෙයක් තෝරා ගැනීමට ඉඩ දී පසෙකට වී උන්නේය.

ගෑනු ළමයා: අර තරුව කීයද

කඩේ මුදලාලි: තුන්සිය පනහයි

ගෑනු ළමයා: මට ඒක දෙන්න. නෑ නෑ ඒක නෙමෙයි. මැද මලක් අලෝල නැති එක. අන්න හරි. මේ බකට් කීයද

කඩේ මුදලාලි: දහයක් සීයයි

ගෑනු ළමයා: මට විස්සක් දෙන්න. ඉටි පන්දමුත් දෙන්න. එතකොට ඔක්කොම ගාන කීයද

කඩේ මුදලාලි: හයසිය හැත්තෑවයි.

ගෑනු ළමයා: අර රවුම් බකට් පැකට් එක කීයද

කඩේ මුදලාලි: තුන්සියයි

ගෑනු ළමයා: (බරපතල ලෙස කල්පනා කිරීමෙන් පසු) මට ඔක්කොම දාහට දෙනවාද

කඩේ මුදලාලි: (මදක් කල්පනා කරන ලෙසක් දක්වා) එහෙනං දෙන්නන්කෝ නෝනා

රොටියා කටක් හෙල්ලුවේ නැත. ගෑනු ළමයා තමා රුපියල් හැත්තෑවක ලාබයක් ලැබුවා නොව රුපියල් තිහක ගොනාට ඇඳ ගැනීමක් සිද්ද කර ගත් වග තේරුම් ගත්තේ මගදී ය. ඔය මරි මෝඩ ගණන් හැදිල්ල සිද්ද කලේ රොටියා වුවා නං මාගලක් දිගට අනුශානාවක් කරන ඈ එදා කිව්වේ මෙන්න මෙච්චරය

කමක් නෑ. අද වෙසක් නේ!!!




Wednesday, May 3, 2017

කුන්ඩුමනී

කුන්ඩුමනී ඊයේ යද්දී අද උදේම එනවයි කියල කිව්වා. එයත් එක්ක අර අනිත් වහන්තරාවත් එල්ලිලා එයි. හැබෑටම මාසයක් තිස්සේ දැකලත් මට තාම බැරි උනානේ ඒ කොල්ලෙක්ද එහෙම නැත්තන් කෙල්ලෙක්ද කියල අඳුන ගන්න. මොකෙක් උනත් මගේ මොකෝ...

කුන්ඩුමනී ගේ හරි නම කේතුමතී කියල එයා දැන් මට එකසිය පනස් එක් වතාවක් කියල තියනවා. ඒ වෙලාවට මම බොරුවට ඔලුව හෙලෙව්වට මම ආයෙත් එයාට කියන්නේ කුන්ඩුමනී කියලම තමයි. එයා කුන්ඩුමනී මිසක් කේතුමතී වෙන්න විදියක් නෑ.

මිනිහෙක්ට නින්ද යන්නේ නෑ කියන්නේ සෙල්ලමක් නෙමෙයි. විශේෂයෙන්ම මං වගේ මිනිහෙක්ට. දවාලට නං බලන් ඉන්න එලිය හරි තියෙනවා. ඒත් රෑට...

සතියක් තිස්සේ එක බින්දුවක් ඇහැ පියවන්නේ නැතුව හිටියා කිව්වම... දොස්තර දුන්න පෙති හැටහුටාමාරෙන් එකකටවත් බැරි උනානේ මාව තප්පරයක් නිදි කරවන්න
ඇහැ පියවෙද්දී අවුරුදු තුනහමාරක පොඩි ගෑනු ළමයෙක් සෙල්ලම් බෝනික්කෙක් තුරුල් කරන් මං දිහා බලාගෙන හිනා වෙනවා. එයාගේ අම්මා යටිගියෙන් කෑ ගහනවා. මං ආයෙත් ඇස් අරිනවා. ගෑනු ළමය යන්න යනවා.

කුන්ඩුමනීව දැකපු මුල් දවස මට හොඳට මතකයි.

"මං කේතුමතී.මං නිලියක්" එයා කිව්වේ මේ ලෝකේ ඉන්න හැමෝම එයාව දැනගෙන ඉන්න ඕනේ ස්වරයකින්.
මං උත්තර නොදී එයා දිහා බලාගෙන හිටියා.
"මාව ටීවී එකේ දැකල නැද්ද" මගේ කාමරේ තිබ්බ ටීවී එක දැකලද කොහෙද එයා ඇහුවා.
මේ දවස්වල ටීවී එකේ ඉන්න නිළියන්ට වඩා ස්වාසිලන්තයේ නිලියෝ ටික මතක තියා ගන්න ලේසි බව මම එයාට කිව්වා. එයාගේ මුණ රතුවුනත් බලහත්කාරයෙන් හිනාවක් මවාගෙන මං දිහා බලාගෙන හිටියා. නිළියෝ කියන්නේ නිකංයැ.

මුල් දවස්වල එයා කීප වතාවක් මගේ කාමරේ ලඟට ආව ගියා. මාව කතාවට අල්ල ගන්න හැදුවත් මම එයාව ගණන් ගත්තේ නැහැ.
ඊළඟට මං සෙල්ලන් කරන තැනට ඇවිත් කැමරාව අටවන් හිටියා. මාව ගණන් නොගෙන එහා පැත්තේ හිටිය උන් දෙන්නත් එක්ක කතා කරන බව පෙන්නුවත් එයා මගේ සියලුම ඉරියව් නිරීක්ෂණය කරන බව මට දැනුනා. එයා උන්ගෙන් මං ගැන ඇහුව නං ආයෙත් මගෙත් එක්ක කතාවට එන එකක් නෑ. ඕකුන් මං ගැන කියන කතා මං දැනන් හිටිය. මොකද උන් ඒවා කිව්වේ මගේ මුණටමයි. මම ආපු අලුත මදි නොකියන්න ගුටි කෑවා. දැන් නං උන් මාව අතෑරලා ඉන්නේ. ඒත් එකෙක්වත් මාත් එක්ක කතාවක් නෑ
.
මට ජෙනා ඉන්නවා. ඒ කියන්නේ අර පොඩි ගෑනු ළමයාගේ නම. ඒත් එයත් මගෙත් එක්ක කතාවක් නෑ.

කුන්ඩුමනීට මගෙත් එක්ක සම්මුඛ සාකච්ඡාවක් තියන්න ඕනේ උනා. අවුරුදු ගානක් කතා කරන්න කෙනෙක් හිටියේ නැති මම ඒකට කැමති උනා.

මෙහෙ බාබරයෙක් හිටියට ඌ මගේ කොන්ඩේ කපන්න කැමති නෑ. නොකපම බැරි නිසා ඌ කැපුවත් ඊට වඩා හොඳට මට තනියෙන් කපා ගන්න පුළුවන්. අනෙක ඌ කොන්ඩේ කපන මුළු වෙලේ අනෙක් එවුන් එක්ක කියන කතා අහද්දී මට යටිගිරියෙන් කෑ ගහන්න ඕනේ වෙනවා.දැන් මම කොන්ඩේ බඳිනවා.

කෝරි මට හිනා වෙනවා. කෝරි කියන්නේ ජෙනාගේ අම්මා. මම හැම උපන්දිනේටම කෝරිට සුබපැතුමක් යවනවා.අන්තිම අවුරුදු වල ඒ යවන සුබපැතුම ආපහු මටම හරවල එවනවා. "එහෙම කෙනෙක් මෙම ලිපිනයේ පදිංචි නැත" කියල රතුපාටින් ලියල. ඒ ගොල්ලෝ වෙන කොහේ හරි පදිංචියට යන්න ඇති. මම එයාට උපන්දින සුබපැතුමක් යවනවය කියල කෝරි දන්න බව මට විස්වාසයි.

කුන්ඩුමනී දොඩම් පාට ගවුමක් ඇඳන් කකුලක් පිට කකුලක් දාගෙන , ෆයිල් එකකුත් උකුලේ තියාගෙන වාඩිවෙලා ඉන්නවා. එයා ඉස්සරහ තියෙන අනික් පුටුව මට වෙන්නැති.

මේ කෙහෙල්මල් පුටුවේ වාඩි උනාය කියල මම කුන්ඩුමනීට මොනවා කියන්නද. මට පේන හීන, ජෙනා, කෝරි ගැන කියන්නද..

ලැයිස්තුවේ ඊළඟට ඉන්නේ ඔයා. ඒ ගැන මොකද හිතෙන්නේ.

මම එයාට කිව්වා ඒ ගැන මට තියෙන්නේ සතුටක්ය කියල. මම විඳින්නේ මරණීය වේදනාවකටත් වඩා ලොකු වේදනාවක් කියන දේ මම එයාට පැහැදිලි කළා."මම හිතන්නේ ඔයාට මම කියන වේදනාව තේරුම් ගන්න බෑ"

"ඔව් , මට බෑ" කුන්ඩුමනී කිව්වා.

ඒක ගැන ඔයා සංතෝස වෙන්න. ඒ වගේ වේදනාවක් දැනුනොත් ඔයා ස්වාසිලන්තෙටත් වැඩක් නැති නිලියක් වෙයි.

ඇයි ඔයා කෝරි ගේ උපන්දිනේට කාර්ඩ් එකක් යවන්නේ

මම එයාගේ ජිවිතේ කොටස්කාරයෙක්. ඒක නැහැයි කියන්න කාටවත් බැහැ. එයත් මගේ ජිවිතේ කොටස්කාරියක්. අපි දෙන්න කැමැත්තෙන් හරි අකමැත්තෙන් හරි අපේ ජිවිත වලට හවුල් උනා.

ඒත් ඔයා ජෙනා ට කාර්ඩ් එකක් යවන්නේ නෑ නේද

ජෙනාගේ උපන්දිනේටත් මම හැමදාම සුබපැතුමක් ලියන බවත් ඒක තැපැල් නොකරන බවත් මම එයාට කිව්වා.

කුන්ඩුමනී ඔලුව වැනුවා. "ඔයා පසුතැවෙනවද සිද්ද වුනු දේ ගැන"

"පසුතැවෙනවද?". මම මුල් වතාවට එයාගේ ඇස් දිහා කෙලින් බැලුවා. "මම හැම තත්පරයකම මැරී මැරී උපදිනවා. මට හිතා ගන්න බෑ මම එහෙම දෙයක් කලේ කොහොමද කියල. මම දවස් ගාණකින් ගෑනියෙක් ලඟට ගිහිං තිබ්බේ නෑ. මං ළඟ සල්ලි තිබ්බෙත් නෑ. මට ඕනේ උනේ ගෑනියෙකුයි සල්ලියි විතරයි. පළවෙනි ගෙදරට ගිහිං වතුර එකක් ඉල්ලුව. වතුර වීදුරුව දුන්නේ පිරිමි කෙනෙක්. මම ඊළඟට ගෙවල් දෙකක් ඇරලා තුං වෙනි ගෙදරට ගියා"

මං දීර්ග හුස්මක් පිටකරල ඇස් දෙක පියා ගත්තා. මට එදා සිද්දිය මැවිලා පෙනුනා.රෝස පාට ගවුමක් ඇඳන් දුඹුරු පාට වලහෙක් තුරුල් කරගෙන හිටිය ජෙනා දොර අරිනවා මට මැවිලා පෙනුනා. දත් දෙකක් වැටුණු කටෙන් හිනා වෙලා එයා කෝරිට කතා කළා. මගේ පිහිය දිලිසෙනවා මට පෙනුනා. කෝරි දඟලනවා මට දැනුනා. ජෙනා අන්තිමට මං දිහා බලාගෙන හිටිය විදියටම තාමත් බලාගෙන ඉන්නවා.

ඔයා මුලින්ම කිව්වේ ඒ දේ කලේ ඔයා නෙවෙයි කියල. ඔයා පොඩි ළමයින්ට හරි ආදරෙයි කියලත් කිව්වා

මං හිස් බැල්මෙන් එයා දිහා බලන් හිටියා. ඒ සිද්දිය, ඒ බොරුව, ඒ ඇපෑල , අද මම විඳවන විඳවිල්ල මම එයාට කොහොම තේරුම් කරන්නද. මට කියන්න තියෙන්නේ කෝරිගේ පවුලේ අයට, එයාගේ ලොකු දුවට, එයාගේ මහත්තයට මට සමාවෙන්න කියල විතරයි. ඒත් මම ඒ අයගෙන් කොහොම සමාවක් බලාපොරොත්තු වෙන්නද

ඔයා ඔයාගේ දෙවැනි ඇපෑල අවලංගු කලේ ඒකද

මේ වගේ මරණීය වේදනාවක් විඳ විඳ ජීවත්වෙලා ඉද්දි, ජිවිත කාලය තව මොහොතක් හරි දික් කරගන්න හිතන එක, ස්වාසිලන්තේ නිලියක් වෙන්න හිතනවටත් වඩා විහිළුකාරයි කියල මම කුන්ඩුමනීට කිව්වා


කුන්ඩුමනී

කුන්ඩුමනී ඊයේ යද්දී අද උදේම එනවයි කියල කිව්වා. එයත් එක්ක අර අනිත් වහන්තරාවත් එල්ලිලා එයි. හැබෑටම මාසයක් තිස්සේ දැකලත් මට තාම බැරි උනානේ ඒ කොල්ලෙක්ද එහෙම නැත්තන් කෙල්ලෙක්ද කියල අඳුන ගන්න. මොකෙක් උනත් මගේ මොකෝ...

කුන්ඩුමනී ගේ හරි නම කේතුමතී කියල එයා දැන් මට එකසිය පනස් එක් වතාවක් කියල තියනවා. ඒ වෙලාවට මම බොරුවට ඔලුව හෙලෙව්වට මම ආයෙත් එයාට කියන්නේ කුන්ඩුමනී කියලම තමයි. එයා කුන්ඩුමනී මිසක් කේතුමතී වෙන්න විදියක් නෑ.

මිනිහෙක්ට නින්ද යන්නේ නෑ කියන්නේ සෙල්ලමක් නෙමෙයි. විශේෂයෙන්ම මං වගේ මිනිහෙක්ට. දවාලට නං බලන් ඉන්න එලිය හරි තියෙනවා. ඒත් රෑට...

සතියක් තිස්සේ එක බින්දුවක් ඇහැ පියවන්නේ නැතුව හිටියා කිව්වම... දොස්තර දුන්න පෙති හැටහුටාමාරෙන් එකකටවත් බැරි උනානේ මාව තප්පරයක් නිදි කරවන්න
ඇහැ පියවෙද්දී අවුරුදු තුනහමාරක පොඩි ගෑනු ළමයෙක් සෙල්ලම් බෝනික්කෙක් තුරුල් කරන් මං දිහා බලාගෙන හිනා වෙනවා. එයාගේ අම්මා යටිගියෙන් කෑ ගහනවා. මං ආයෙත් ඇස් අරිනවා. ගෑනු ළමය යන්න යනවා.

කුන්ඩුමනීව දැකපු මුල් දවස මට හොඳට මතකයි.

"මං කේතුමතී.මං නිලියක්" එයා කිව්වේ මේ ලෝකේ ඉන්න හැමෝම එයාව දැනගෙන ඉන්න ඕනේ ස්වරයකින්.
මං උත්තර නොදී එයා දිහා බලාගෙන හිටියා.
"මාව ටීවී එකේ දැකල නැද්ද" මගේ කාමරේ තිබ්බ ටීවී එක දැකලද කොහෙද එයා ඇහුවා.
මේ දවස්වල ටීවී එකේ ඉන්න නිළියන්ට වඩා ස්වාසිලන්තයේ නිලියෝ ටික මතක තියා ගන්න ලේසි බව මම එයාට කිව්වා. එයාගේ මුණ රතුවුනත් බලහත්කාරයෙන් හිනාවක් මවාගෙන මං දිහා බලාගෙන හිටියා. නිළියෝ කියන්නේ නිකංයැ.

මුල් දවස්වල එයා කීප වතාවක් මගේ කාමරේ ලඟට ආව ගියා. මාව කතාවට අල්ල ගන්න හැදුවත් මම එයාව ගණන් ගත්තේ නැහැ.
ඊළඟට මං සෙල්ලන් කරන තැනට ඇවිත් කැමරාව අටවන් හිටියා. මාව ගණන් නොගෙන එහා පැත්තේ හිටිය උන් දෙන්නත් එක්ක කතා කරන බව පෙන්නුවත් එයා මගේ සියලුම ඉරියව් නිරීක්ෂණය කරන බව මට දැනුනා. එයා උන්ගෙන් මං ගැන ඇහුව නං ආයෙත් මගෙත් එක්ක කතාවට එන එකක් නෑ. ඕකුන් මං ගැන කියන කතා මං දැනන් හිටිය. මොකද උන් ඒවා කිව්වේ මගේ මුණටමයි. මම ආපු අලුත මදි නොකියන්න ගුටි කෑවා. දැන් නං උන් මාව අතෑරලා ඉන්නේ. ඒත් එකෙක්වත් මාත් එක්ක කතාවක් නෑ
.
මට ජෙනා ඉන්නවා. ඒ කියන්නේ අර පොඩි ගෑනු ළමයාගේ නම. ඒත් එයත් මගෙත් එක්ක කතාවක් නෑ.

කුන්ඩුමනීට මගෙත් එක්ක සම්මුඛ සාකච්ඡාවක් තියන්න ඕනේ උනා. අවුරුදු ගානක් කතා කරන්න කෙනෙක් හිටියේ නැති මම ඒකට කැමති උනා.

මෙහෙ බාබරයෙක් හිටියට ඌ මගේ කොන්ඩේ කපන්න කැමති නෑ. නොකපම බැරි නිසා ඌ කැපුවත් ඊට වඩා හොඳට මට තනියෙන් කපා ගන්න පුළුවන්. අනෙක ඌ කොන්ඩේ කපන මුළු වෙලේ අනෙක් එවුන් එක්ක කියන කතා අහද්දී මට යටිගිරියෙන් කෑ ගහන්න ඕනේ වෙනවා.දැන් මම කොන්ඩේ බඳිනවා.

කෝරි මට හිනා වෙනවා. කෝරි කියන්නේ ජෙනාගේ අම්මා. මම හැම උපන්දිනේටම කෝරිට සුබපැතුමක් යවනවා.අන්තිම අවුරුදු වල ඒ යවන සුබපැතුම ආපහු මටම හරවල එවනවා. "එහෙම කෙනෙක් මෙම ලිපිනයේ පදිංචි නැත" කියල රතුපාටින් ලියල. ඒ ගොල්ලෝ වෙන කොහේ හරි පදිංචියට යන්න ඇති. මම එයාට උපන්දින සුබපැතුමක් යවනවය කියල කෝරි දන්න බව මට විස්වාසයි.

කුන්ඩුමනී දොඩම් පාට ගවුමක් ඇඳන් කකුලක් පිට කකුලක් දාගෙන , ෆයිල් එකකුත් උකුලේ තියාගෙන වාඩිවෙලා ඉන්නවා. එයා ඉස්සරහ තියෙන අනික් පුටුව මට වෙන්නැති.

මේ කෙහෙල්මල් පුටුවේ වාඩි උනාය කියල මම කුන්ඩුමනීට මොනවා කියන්නද. මට පේන හීන, ජෙනා, කෝරි ගැන කියන්නද..

ලැයිස්තුවේ ඊළඟට ඉන්නේ ඔයා. ඒ ගැන මොකද හිතෙන්නේ.

මම එයාට කිව්වා ඒ ගැන මට තියෙන්නේ සතුටක්ය කියල. මම විඳින්නේ මරණීය වේදනාවකටත් වඩා ලොකු වේදනාවක් කියන දේ මම එයාට පැහැදිලි කළා."මම හිතන්නේ ඔයාට මම කියන වේදනාව තේරුම් ගන්න බෑ"

"ඔව් , මට බෑ" කුන්ඩුමනී කිව්වා.

ඒක ගැන ඔයා සංතෝස වෙන්න. ඒ වගේ වේදනාවක් දැනුනොත් ඔයා ස්වාසිලන්තෙටත් වැඩක් නැති නිලියක් වෙයි.

ඇයි ඔයා කෝරි ගේ උපන්දිනේට කාර්ඩ් එකක් යවන්නේ

මම එයාගේ ජිවිතේ කොටස්කාරයෙක්. ඒක නැහැයි කියන්න කාටවත් බැහැ. එයත් මගේ ජිවිතේ කොටස්කාරියක්. අපි දෙන්න කැමැත්තෙන් හරි අකමැත්තෙන් හරි අපේ ජිවිත වලට හවුල් උනා.

ඒත් ඔයා ජෙනා ට කාර්ඩ් එකක් යවන්නේ නෑ නේද

ජෙනාගේ උපන්දිනේටත් මම හැමදාම සුබපැතුමක් ලියන බවත් ඒක තැපැල් නොකරන බවත් මම එයාට කිව්වා.

කුන්ඩුමනී ඔලුව වැනුවා. "ඔයා පසුතැවෙනවද සිද්ද වුනු දේ ගැන"

"පසුතැවෙනවද?". මම මුල් වතාවට එයාගේ ඇස් දිහා කෙලින් බැලුවා. "මම හැම තත්පරයකම මැරී මැරී උපදිනවා. මට හිතා ගන්න බෑ මම එහෙම දෙයක් කලේ කොහොමද කියල. මම දවස් ගාණකින් ගෑනියෙක් ලඟට ගිහිං තිබ්බේ නෑ. මං ළඟ සල්ලි තිබ්බෙත් නෑ. මට ඕනේ උනේ ගෑනියෙකුයි සල්ලියි විතරයි. පළවෙනි ගෙදරට ගිහිං වතුර එකක් ඉල්ලුව. වතුර වීදුරුව දුන්නේ පිරිමි කෙනෙක්. මම ඊළඟට ගෙවල් දෙකක් ඇරලා තුං වෙනි ගෙදරට ගියා"

මං දීර්ග හුස්මක් පිටකරල ඇස් දෙක පියා ගත්තා. මට එදා සිද්දිය මැවිලා පෙනුනා.රෝස පාට ගවුමක් ඇඳන් දුඹුරු පාට වලහෙක් තුරුල් කරගෙන හිටිය ජෙනා දොර අරිනවා මට මැවිලා පෙනුනා. දත් දෙකක් වැටුණු කටෙන් හිනා වෙලා එයා කෝරිට කතා කළා. මගේ පිහිය දිලිසෙනවා මට පෙනුනා. කෝරි දඟලනවා මට දැනුනා. ජෙනා අන්තිමට මං දිහා බලාගෙන හිටිය විදියටම තාමත් බලාගෙන ඉන්නවා.

ඔයා මුලින්ම කිව්වේ ඒ දේ කලේ ඔයා නෙවෙයි කියල. ඔයා පොඩි ළමයින්ට හරි ආදරෙයි කියලත් කිව්වා

මං හිස් බැල්මෙන් එයා දිහා බලන් හිටියා. ඒ සිද්දිය, ඒ බොරුව, ඒ ඇපෑල , අද මම විඳවන විඳවිල්ල මම එයාට කොහොම තේරුම් කරන්නද. මට කියන්න තියෙන්නේ කෝරිගේ පවුලේ අයට, එයාගේ ලොකු දුවට, එයාගේ මහත්තයට මට සමාවෙන්න කියල විතරයි. ඒත් මම ඒ අයගෙන් කොහොම සමාවක් බලාපොරොත්තු වෙන්නද

ඔයා ඔයාගේ දෙවැනි ඇපෑල අවලංගු කලේ ඒකද

මේ වගේ මරණීය වේදනාවක් විඳ විඳ ජීවත්වෙලා ඉද්දි, ජිවිත කාලය තව මොහොතක් හරි දික් කරගන්න හිතන එක, ස්වාසිලන්තේ නිලියක් වෙන්න හිතනවටත් වඩා විහිළුකාරයි කියල මම කුන්ඩුමනීට කිව්වා


Monday, April 17, 2017

ඩාඩියාගේ ලෝකය -02


පළමු කොටස

නයිල් නදි ඉහත්තාවේ දාරුමය වේදිකාවක සිටන් උන් ඩාඩියා ඇදන් හිඳි සුදු ලෝගුව සුළගේ ලෙල දෙමින් තිබුනේය. පුජකවරුන් විසින් නොනවත්වාම දල්වා තිබූ අබිං මිශ්‍ර විෂ ධුමය නිසා ඩාඩියා තමා වටා උන් නිරුවත් දරුවන් පහළොස් දෙනා දුටුවේද අපහසුවෙනි. පුරා දෙහොරාවකට අධික කාලයක් ස්ත්‍රෝත්‍ර ගායනයේ යෙදුනු ආගන් සෙමෙන් සෙමෙන් ලී වේදිකාවට ගොඩ වත්ම එහි රැස්ව උන්නෝ දෙපසට වී මහත් භක්තියෙන් යුතුව ඔහුට ඉඩසර ලබා දුන්නෝය. අනතුරුව කුඩා දරුවෙකු දෝතින් ඔසවා ගත් ඔහු දරුවාගේ නළල සිඹ මන්ත්‍ර වගයක් ජපකර එක්වරම ඒ දරුවා නදියට විසි කළේය. ඒ දසුනින් හොඳටම බියපත්ව උන් ඉතිරි දරුවන් වෙර යොදා ග්‍රහණය කරගත් සෙසු පුජකවරුන් ඔවුන් එකා බැගින් දියට විසිකර දමන අයුරුත්, ආගන් කුරිරු සිනාවක් පාමින් තමා දෙසට පැමිණෙන පැමිණෙන අයුරුත් දුටු ඩාඩියා හැකි වෙර යොදා කෑ ගැසුවාය.

----------------------------------------------------

ඈ උන්නේ වෙවුලමිනි. තමා සිහිනෙන් දුටු භීෂණයේ සැබෑවටම උන්නේ තමා නොවන බව පසක් කර ගැනීමටද ඈට ටික වෙලාවක් ගතවිය. අනතුරුව මහ හඩින් හඬමින් සිටියදී දියට විසි කර දැමූ තම වැඩිමල් සොහොයුරා සහ අබිං දුමෙන් හොඳ හැටි මත්වීම නිසා කිසිම විරුද්ධත්වයකින් තොරවම දියට විසිකළ කුඩා සොයුරා මෙන්ම ආගන්ගේ කුරිරු හස්තයට අසුවුණු රූමත් යුවතිය පිළිබඳව සිතමින් ඩාඩියා බොහෝ වෙලාවක් හඬා වැටුනාය.

උදෑසන පළමු සීනුව නාද වෙනවාත් සමගම ඈ වා කවුළු විවර කලාය. නොබෝ වෙලාවකින් ඇගේ පරිවාර යුවතිය කුටියට පැමිණෙන බව ඈ දැන් දන්නීය. රාජකීය නලගනක ලෙස තමා මෙහි සිටින තාක් කල් මෙම කාල සටහනට අනුව වැඩ කල යුතු බව ඈ ඉගෙන ගෙන සිටින්නීය.

ඩාඩියාගේ පරිවාර යුවතිය හීලියා දොඩමලු කුඩා කෙල්ලක් හෙයින් පුජක ගෙවල් මෙන්ම මන්දිර ඇතුලත සිදුවන බොහෝ දේවල් ඩාඩියා මේ සතිය අවසන් වන විට දැනගෙන උන්නාය. ආගන් පහළොස් හැවිරිදි වියේදී ඇසුරු කල රාජකීය නළගනට ආගන්ට දාව ලැබුණු දියණිය වයස නවයක් වන විටම ආගන් විසින්ම කෙලෙසු හැටිත් ඒ කුඩා දැරිය බිහි කල දරුවාද වැඩිවිය පැමිණි විට ආගන් විසින් නතු කරගන්නට උත්සහ ගත් අයුරුත්, ඒ වන විටත් වෙන තරුණයෙකු ඇසුරු කරමින් සිටි යුවතිය, තමන්ගේ පියා මෙන්ම සීයාද වන ආගන්ව ප්‍රතික්ෂේප කල අයුරුත්, වියරු වැටුණු ආගන් පාරාවෝ රැජින නම්මාගෙන මහා පුජා උත්සවයක් සංවිධානය කොට ඒ රූමත් යුවතියව ඇගේ කැමැත්තට විරුද්දව දෙවියන්ට කැප කොට ආගන් විසින්ම ප්‍රසිද්ධ දුෂණයකට ලක් කොට අනතුරුව මහා නයිල් පුජාවේදී ඈව නයිල් නදියට බිලි කල අයුරුත් හීලියා විසින් පුරා තෙදිනක් පුරා ඩාඩියාට පවන්නට යෙදුනාය.

නළගනන්ට සිය නර්තන ඇදුම් තෝරා ගැනීමට ඉඩ දුන් අවස්ථාවේ ඩාඩියා විසින් තෝරාගත්තේ ඈට අඩුම වටිනාකමක් ලබා දෙන ඇදුම් කට්ටලයයි. නාටිකාංගනාවන් සිය සයනයට ගැනීමේදී ඔවුන්ගේ පෙනුම මෙන්ම තත්වය ගැන සිතන රජවරු, සිටුවරු මෙන්ම පුජකවරු ඩාඩියා තෝරාගත් ශ්වේත ලෝගුව හා මුව වැස්ම සහිත අඩු වටිනාකමැති නළගනන් දෙස නොබලන බව ඈට කියා දුන්නේ හීලියාය.

රූමත් යුවතියන් දොළොස් දෙනෙකුගෙන් සමන්විත වුනු ඩාඩියාගේ නර්තන කණ්ඩායමේ හුන් ඉතාමත්ම දඟකාර, ඉඟි බිඟි සහිත යුවතියන් පස්දෙනා අතර වටිනාම නාටිකාංගනාව වීම පිණිස ඇතිවුණු තරඟය හේතුවෙන්, ඊට මැදිහත් වීමට ප්‍රධාන නළඟන මෙන්ම නළඟන ගෘහයේ අධිපතිනිය වූ සිසිලියාට සිද්ද උනේය. කෙල්ලන් පස් දෙනාම එකසේ දක්ෂ බැවින් ඒ පිළිබඳව තනි තීරණයකට පැමිණීම සිසිලියාටද දුෂ්කර විය. අනතුරුව ඈ එදින රාත්‍රියේදී ඔවුන් පස්දෙනා අතුරින් සුදුසුම නළඟන තීරණය කරන තරඟයක් පැවැත්වීමට තීරණය කලාය. ඒ සඳහා නළඟන ගෘහයේ හුන් සියල්ලෝමද , සේරෝස් ඇතුළු පුජකවරුන් සිව් දෙනෙක්ද, පාරාවෝ රැජිණිය හා ඇගේ යෙහෙලියක් වූ මව්ලින් ආර්යාවද සහබාගි වන බව දැනුම් දුන්නාය.

යටකී කෙල්ලන් පස් දෙනා අතර තරඟය ගැන පුදුමාකාර උද්‍යෝගයක් පැවති අතර එදින රාත්‍රී සාදය පිළිබඳව ඩාඩියා ඇතුළු සෙස්සෝ ඊට නොදෙවෙනි උද්යෝගයකින් උන්නෝය. එදින පස්වරුවේ ඔවුන්ව දෛනික කාල සටහනෙන් නිදහස් කොට තිබූ නිසා ඔවුන්ට සිත්සේ හැඩ වැඩ වීමට උවමනා තරම් කාලවේලා ලැබිණි. ප්‍රධාන නළඟන විසින් නළඟන ගෘහයේ සියල්ලන්ටම අවශ්‍ය රෙදිපිළි සපයා තිබූ අතර අනෙක් කෙල්ලන් විනිවිද පෙනෙන වටිනා චීන සළු තෝරා ගනිද්දී ඩාඩියා දළ රෙද්දෙන් මැසූ දුඹුරු පැහැ ඇඳුමකින් සෑහීමට පත් වූවාය. තමාගේ ඇඳුමෙන් ප්‍රභූන් අතරට යා නොහැකි වීම ඈට ගෙන දුන්නේ සහනයකි.

ගෘහයේ තැනින් තැන සවි කර තිබූ පලිඟු බෝල කහ පැහැයෙන් දැල්වෙන විට (ගිනි දැල්විමකින් තොරව දැල්වෙන පලිඟු බෝල ඈ මුල්වරට දුටුවේ මෙහි පැමිණි පසුය)විණා හඬ මධ්‍යයේ උත්සවය ආරම්භ විය. ශාලාවේ දිගු මේසයක් මත ඩාඩියා කිසි දිනෙක නොදුටු ආහාර පාන වලින් පිරි පැවතිනි. සේරෝස් හා රැජිණ ප්‍රමුඛ ප්‍රභූ වරුන්ට ශාලාවේ උස් පුටු පනවා තිබුනද ඩාඩියා ඇතුළු සෙස්සෝ අසුන් ගත්තේ බිමය.

ප්‍රධාන නාටිකාංගනාව සිය අමුත්තන්ට සංග්‍රහ කර අවසන් වූ පසු වයින් විදුරු අතැතිව ඔවුහු සිය අසුන් වල තැන්පත් වූහ. අනතුරුව මිහිරි ගායනාවකින් නාටිකාංගනාවන් පස් දෙනා ශාලාවට අවතීර්ණ වූහ. පොළොවට නොදැනෙන ලෙස පාද තබමින් එකිනෙකාට නොපරදින ලෙස ඔවුන් ඉදිරිපත් කල මනහර රැඟුම් අතරේ හොඳම රඟන්නිය කවුදැයි සිතා ගැනීමට ඩාඩියාටද නොහැකි විය.

හිටිහැටියේම උත්සවය මැද්දට අනාරාධිත පුජකවරයෙක් පැමිණි අතර, මිටි තරබාරු ඔහු දුටුවනම ආගන් බව හදුනා ගැනීම ඩාඩියාට අපහසු නොවිණි. ආගන් දුටු විට සිසිලියා කෘතීම සිනාවක් නැගූ අතර ප්‍රභූ වරු අතරින් ඔහුව උණුසුම් ලෙස පිළිගත්තේ රැජිණ පමණකි. මෙතැනින් හොඳම නළඟනට සිය පෞද්ගලික දේවදාසි ධූරය පිරිනමන බව පැවසූ ආගන්, ඒ වනවිට සිය නැටුම් ගැයුම් නවතා පසෙකට වී සිටි නළගනන් ට නැවතත් නැටුම ආරම්භ කරන ලෙස සන් කරමින් අසුන් ගත්තේ ඔහුට තරම් නොවන මනමාල මුකුළුවක් සහිතවය. සිය කෑදර දෙනෙත් වලින් නිරුවත් නළඟන නර්ථනය දෙස බලා උන් ආගන්ගේ දෙනෙතට බලාපොරොත්තු නොවූ මොහොතක ඩාඩියාගේ දෙනෙත මුණගැසුණේය. ක්ෂණයකින් ඈ දෑස ඔහුගෙන් මුදා ගත්තද ඒ වන විටත් ඈ හොඳටම ප්‍රමාදය...

මතු සම්බන්ධයි~



Wednesday, March 29, 2017

ඩාඩියාගේ ලෝකය -01

ඉර උදාවන්නටත් පෙර සිටම පටන් ගන්නට යෙදුනු බමුණන්ගේ ස්ත්‍රෝත්‍ර ගායනා තාමත් ඉවරයක් වී නැත්තේය. එය ඉවර වන්නට නම් නගරය මැද පිහිටි ඇසක හැඩයට නිමවුණු දැවැන්ත තල පුවරුව, ප්‍රධාන පුජක අසපුවේ දොර විවර වීමට තරම් උණුසුම් විය යුත්තේය.සාමාන්යෙන් නම් ඉර මුදුන් වී හෙවණැල්ල දෑඟුලක් පමණ දික් වූ විට දොරටුව විවර වන බව ඩාඩියා උගත්තේ මවගෙනි

. ඒත් තමා ඉපදීමට පෙර පැමිණි වැසි සමයක පූජක දොරටුව විවර වන්නට තුන් මාසයක් ගතවුණු සැටිත්, ඒ වන විට ප්‍රධාන පුජක තැන ඇතුළු පුජකවරු තිස් දෙදෙනෙක් මියගොස් සිටි හැටිත් ඈ අසා තිබුණාය. දිවි බේරාගෙන තිබුනේ ආගන් නම් පුජකවරයා පමණි. එතුමා දෙවියන් හා සමවනු වස් අට්ලන්සේරා රජ විසින් එතුමාට විසල් සොහොනක් තනන්නට පටන් ගත් අතර, එහි වැඩ නිමා වූ වහාම එය ආගන්ගේ සදාකාලික නිවහන වනු ඇත්තේය.ඩාඩියා තමා හිඳන් උන් ජනෙල් කවුළුවෙන් එබී ලහි ලහියේ වැඩ නිම වන ඒ සොහොන දෙස බලා උන්නාය. එවකට අට අවුරුදු වියෙහි වුන් ආගන් දැන් තිස් නව වියේය. ඒ රාජකීය සොහොනේ එතුමන් හා සැපතීම අසිරිමත් සදාකාලික ජිවනයකට හේතු වන්නේයැයි සිය මව විසින් කියා තිබුනද, ශුද්වූ කන්‍යාවියන් සොයා හේවායන් පැමිණෙන විට ඩාඩියා සිය සුපුරුදු තිප්පොලෙහි සැඟවී උන්නාය. ඒ සඳහා ඩාඩියාගේ ඉතිරි සහෝදරියන් පස්දෙනා අතර තරඟයක් පැවති අතර වාසනාවන්තිය වුයේ පෙද්වෝ ය. හේවායන් සමග පැමිණි කාන්තාවන් තිදෙනෙක් පෙද්වෝ ව නිවසේ ඇතුළු කාමරයකට රැගෙන ගොස් පුරා හෝරාවන් තුනක් තිස්සේ සිදුකලේ කුමක්දැයි ඩාඩියා නොදැන උන් නමුත් ඉන් පසුව පෙද්වෝ සංසුන් ගමන් ලතා ඇති කදිම තරුණියක් බවට පත්වී උන්නාය.
ඩාඩියා ගේ පියා මදක් කුදු නමුත් ශක්තිමක් කම්කරුවෙක් වූ අතර මව කාලයකට ඉහත රැජිනියන් ගේ පරිවාර කාන්තාවක බව ඈ දැන සිටියාය. ගැහැණු ළමයෙකුට නියැලෙන්නට හැකි උසස් වෘත්තීන් කිහිපයක් තිබූ අතර ඩාඩියා ගේ මවගේ ඒකායන අරමුණ වී තිබුනේ සිය රුවැති දියණියන් සයදෙනා එලෙස උසස් වෘතීන්ගේ නියැලෙනු දැකීමය.

ඩාඩියාට සිටි පිරිමි සොයුරන් තිදෙනෙක්ගෙන් දෙදෙනෙක්ම පසුගිය වසරේ නයිල් පුජාව සඳහා කැපකරන ලද්දේය. තමාත් සමග සෙල්ලමින් කල් ගෙවූ එක හා සමාන නිවුන් සොයුරන් දෙදෙනාව තේරීමේ පරීක්ෂණය සඳහා ගෙන ගියේ මව විසින්ය. උපන්දා සිටම ලී අච්චුවක සිරකර තිබූ හෙයින් ඔවුන්ගේ හිස් කදිම උල් හැඩයකින් යුතු වූ නිසා පරීක්ෂණයෙන් සමත්වන්නට ඔවුන් දෙදෙනා වාසනාවන්ත වූ බව ඇගේ මව පැවසුවාය. ඩාඩියා පුදුම වූයේ සිය මවගේ දුර දක්නා නුවණ පිලිබඳවය.දරුවන් දෙදෙනෙකුම ශුද්ධවරයට ඔසවා තැබෙන බැවින් පුජාව නැරඹීමේ මාහැඟි අවස්තාව ඩාඩියාගේ පවුලේ අයට හිමිවූ අතර කෙස් මුළුමුනින්ම සිඳලූ නිරුවත් දරුවන් පහළොස් දෙනා අතරින් සිය දෙබෑයන් ඈ හඳුනා ගත්තේ ඉතා අපහසුවෙනි.පූජාවට කැපකර සිටිනා ඉතා රූමත් යුවතිය ඉහල පවුලක කෙල්ලක් බවත්, උපන්දා සිට ඈව ඒ සඳහා පුහුණු කර ඇති බවත් ඩාඩියා දැනගත්තේ කාන්තාවන් දෙදෙනෙකුගේ කතාබහකට කන් දීමෙනි.

ඩාඩියාගේ ඉතිරි සොයුරා කම්කරුවෙකු ලෙස පුහුණුවට බැඳුනු අතර ඈට ඉතා වැඩිමල් සහෝදරියක සිටි බවත් ඈ මවගේ කැමැත්තට පිටින් රැකියාවක් තෝරාගෙන තරුණයෙකු හා විවහා වූ බවත් ඈ දැන උන්නේ සිය පියාගේ මවගේ ඕපාදුප කතා වලට කන් දීමෙනි.ඒ මිත්තනිය හැමදාම මෙන් සිය කතාව අවසාන කලේ "සියලුම දෙනා ගැන වද වීමට තරම් කාලයක් දෙවියන්ට නැති" බව පවසාය.තව එක දරුවෙකු උසස් රැකියාවකට බඳවා ගතහොත් ඩාඩියාගේ පියාට කම්කරු රැකියාවෙන් අත් මිදීමට හැකිය.

ඉන් වසර දෙකකට පසුව ඩාඩියා මවගේ කැමැත්ත අනුව යුවතීන්ට උසස් රැකියා තෝරා දෙන නිලධාරි තැන හමුවීමට ගිය අතර ඈට කමිටුවේ උන් පිරිමින් දෙදෙනෙකු හා ගැහැණුන් දෙදෙනෙකු ඉදිරිපිට මුළුමුනින්ම නිරුවත් වන්නටත් ඉක්බිතිව උස් වූ පුවරුවක වැතිර සිය දෙකකුල් පළල් කර පෙන්වන්නටත් සිද්ද උනේය. නිරුවත් යුවතියන් සිය දෙනෙකු අතරින් තිස් දෙනෙකු උසස් රැකියා සඳහා සුදුසුකම් ලත් අතර ඒ අතර රැඳී හිඳීමට තරම් ඩාඩියා වාසනාවන්ත වුවාය. ඉනුත් රූමත්ම යුවතිය බෙකෙටෙටන් කුමරාගෙන් කලලයක් දැරීමට සුදුසු වූ අතර ඊළඟට රූමත් යුවතියන් පිලිවෙලින් අමුන් සහ අනුබිස් දෙවියන්ගේ සහකාරියන් වීමට වාසනාව ලදහ.

අනතුරුව බෙකෙටෙටන්, අමුන් සහ අනුබිස් ශාලාවට පැමිණි අතර කළු පැහැති කොට රෝම බහුල බෙකෙටෙටන්, බැටළු හිසක් හා වලිගයකින් යුත් අමුන් හා සිවලෙකු වූ අනුබිස් දුටු ඩාඩියාට තමා මෙතැනින් රූමත්ම යුවතිය නොවීම පිළිබඳව සතුටක් දැනුනේය. පියාගේ මව උන්නේ නම් ඩාඩියාගේ සිතිවිලි පිළිබඳව ශාප කරනවා නිසැකය. ඩාඩියාට වැඩිමල් සොයුරිය අනුබිස් ගේ සහකාරියක ලෙස පසුගිය වසරේ තේරී පත් උනු අතර අනුබිස් සමග සංවාසය කොට පිළිසිඳ ගත් දරුවා ප්‍රසුත කිරීමේදී ඈ මියගියද දේවදාසියක ලෙස නම් කරනු ලැබුවාය. ඈ විසින් සාර්ථකව අනුබිස්ගේ දරුවා ප්‍රසූත කලේ නම්, ඒ දරුවාට අනුබිස්ගේ හිස හා වලිගය පිහිටියේ නම් දරුවා දේවත්වයට පත්වන අතර ඈට දිව්‍යමාතා පදවිය දරන්නට තිබුනේය.
අනතුරුව ඩාඩියා ඇතුළු සත්දෙනෙක් රාජකීය නළඟනන් ලෙස පත් කරන ලද අතර ඉතිරි යුවතියන්ව බිසෝවරු පැමිණ සිය පරිවාර සේවය සඳහා තෝරා ගන්නා ලදී. අවසානයට ඉතුරු වන යුවතියන් පුජකයන් වෙත යැවෙනු ඇත්තේය.
ඩාඩියා ඇතුළු නළගනන් සත්දෙනාව රාජකීය නළගන ගෘහය වෙත රැගෙන යන්නට යෙදුනු අතර ඔවුන් වෙත පැමිණි ප්‍රධාන නළගන විසින් නළගන ගෘහයේ නීති පද්ධතිය ඔවුන්ට මුලින්ම හඳුන්වා දෙනු ලැබීය. ඒ අනුව පිරිමියෙකු හා සම්බන්ද වීම ඔවුන්ට සපුරා අකැප අතර රාජකියන්ගෙන් හෝ දෙවියන්ගෙන් ඇරයුමක් ලදොත් ඈව දැනුවත් කල යුතුය. ආහාරපාන මෙන්ම ව්‍යායාම නියම කර ඇති පරිදි සිදු කල යුතු අතර තම තමන්ගේ පවුල් ඇතුළු පිටස්තර ලෝකය හා සම්බන්ධ වීම සපුරා තහනම්ය. දිනකට නියමිත වෙලාවක් රුපලාවන්‍ය සත්කාර සඳහා කැපකළ යුතු අතර සමේ කුඩා අවපැහැ වීමක් හෝ සිදු උනොත් රාජකීය නළගන තත්වයෙන් පහතට හෙලා දැමේ.
ප්‍රධාන නළගනගේ කතාව මුලින් මුලින් අසා උන්නද ඉන් අනතුරුව ඩාඩියාට ඉන් මතක හිටියේ අල්පයක් පමණකි.දීර්ග කතාවක් අවසානයේ සියල්ලන්ටම ආසිරි පැතූ ප්‍රධාන නළගන ඔවුන්ට ඔවුන්ගේ කුටි පෙන්වන ලද්දේය. නිවෙසට වඩා සුඛෝපභෝගී කුඩා කුටියේ නාටිකාවන් මෙම නිවසේදී ඇඳිය යුතු නිල ලෝගුව හා පන් පිරවූ ගුදිරියක් තිබුනේය. පැන් කෙණ්ඩියක්, තැටියක් මෙන්ම ඩාඩියා මෙතුවක් අසා තිබුණු හිස පීරන පනාවක්ද කාමරය තුල විය.


Tuesday, March 21, 2017

පිටරට ඉඳන් වඩින්නේ දෙවියන්ය..

ශ්‍රී ලංකාව වනාහී අරුම පුදුම රටක්ය. එහි වෙසෙන සියල්ලෝම අමු ගෝත්‍රිකයෝය. උන් කන්නේ අමු මස්ය. බොන්නේ ලුණු වතුරය. ඇමරිකාවේ තරම් කුඩ්ඩෝ ලංකාවේ නැති බව අන්තර්ජාලය කියවීමේදී පෙනීයන නමුත් ඌරු වරිගේ සෝමපාල කියනා විදියට ලංකාවේ තරම් කුඩ්ඩෝ ලොවෙත් නැත. ඇමරිකාවේ තරම් අපරාද නොවුනාට හාරිස්පත්තුවේ ටිකිරා කියන්නේ ලංකාවේ ඉන්න තරමක් ඉන්නේ ස්ත්‍රී දූෂක මං පහරන හොරු ටිකක් බවය. ඇමරිකාවේ මිනිස්සු බවුද්ද දර්ශනය ගැන ගැඹුරු හැදැරීම් කරන බව ආරංචි වූ නාසි වත්තේ හෙක්ටර් කියන්නේ ඒ පට්ට පල් බොරු බවත් ඒ තරන් ගෝත්‍රවාදී ආගමක් තවත් නැති බවත්ය.

පිටරට ඉඳන් ලංකාවට එන ඕනෑම එකෙක් ලංකාවේ එවුන්ට ආශ්චර්යමත් සිටුවරුන්ය.නොරට එව්වන්ට හදිසියේවත් මොංගල් විදියට වාහනයක් පදින්න ආසාවක් ආවොත් හෙම උන්ට තියෙන්නේ සින් සින් ගා ලංකාවට එන ටික විතරමය. කටුනායකින් විනාඩි දහයෙන් මිගොමුවට පැමිණ එහි වෙරල පාරේ (එය ප්‍රධාන පාරකි) තමුන්ට හිතු හිතු විදියට ඕනෑම කෙහෙල්මලක් එලවා තමුන්ගේ ආතල් එක ලබා ගත හැක්කේය. ලංකාව අන්න එහෙම රටකි.

ලකාවේ බුවාලා ආතල් පිණිස යන්නේ පට්ට ගණන් හෝටල් වලටය. දැන් දැන් එන බහුතරයක් සුද්දෝ ඉන්නේ හොස්ටල් වලය. ඒ උන් පට්ට රැඩිකල් නිසා මිසක් සල්ලි නැති නිසා හෙම නෙවේය. අපේ උන් වියදම් කර සොමි කරන්නේ උන් පට්ට ගෝත්‍රික වාදීන් නිසා මිසක් උන්ට සල්ලි තියන නිසා නෙමේය.

මේ ලඟදි දවසක රොටියා කාර්ගිල්ස් සාප්පුවට ගෑටුව වෙලාවක පත මයික්‍රෝ බස් එකක් එහෙම්පිටින්ම පැමිණ නැවත්තුවේය. බස් එක පිරි තිබුනේ පිටරැටියන්ගෙන්ය.කාර්ගිල්ස් සාප්පුවේ මැනේජර් තුමාගේ කට කනේය. ඔවුන් දෙතුන්දෙනා එක්කාසු වී බොහෝ වෙලා ෂොපින් කොට අවසානයේ වතුර බෝතලය බැගින් මිලට ගෙන යන්නට ගියෝය. ඔවුනතරින් එක යුවලක් අයිස් පලම් දෙක තුනක් මිලට ගත් අතර මහත දෙහෙත කාන්තාවක් කුඩා විෂබීජ නසන අත් ආලේපයක් රැගෙන යනවා දුටිමි.රොටියාට ඉදිරියෙන් උන් ලාංකික කාන්තාව මිලයට ගත් බඩුවල වටිනාකම අර ඔක්කොම විදේශිකයන් විසින් මිලයට ගත් බඩුමිලට වඩා වැඩි බව පෙනුණු නමුත් මැනේජර් තුමා ඇතුළු කෙලිත්තියන් ඔක්කොම චිකි බිකි ගගා දෙකට නැමුණේ සුදුහම ඉස්සරහාය. ඔය සියල්ලෝම පිටරටකට ගොස් තමන්ටත් එරටේ ඇත්තන්ගෙන් ඔයාකාර ගරු නම්බු ලබාගෙන පැමිණීම යෙහෙකිය.

විදේශිකයන්ට හොඳින් සැලකීම යහපත්, සදාචාර සම්පන්න පුරුද්දක් වන නමුත් පිටරැටියන් ඉදිරිපිට ලංකාවේ එව්වන් තමන්වම දෙකේ කොලේට දමා ගන්නේ ඇයිදැයි රොටියාගේ කුඩා මොලයට වැටහෙන්නේ නැත.මේ දිනවල සමාජ ජාල වල වේගයෙන් සංසරණය වන , සෆාරි රියදුරෙකු විසින් පිටරැටියන් කිහිප දෙනෙක් මගින් බස්සා යාමේ වීඩියෝවේ කැඩුණු ඉංගිරිසි වචන කිහිපයක් ඇසුණු පමණින්, අගක් මුලක් නොදැන ඒ රියැදුරාට පස් පඩන්ගුවේ බනින්නේ කුමන මිම්මක් මූලික කරගෙනදැයි සිතා බැලීම වටනේය.සමහර විට එහි අවසානයේ රියදුරා විසින් සංකේතාත්මකව දක්වන කුනුහරුපය අපේ සත්ගුණවත් අයියලාට දිරවා ගැනීම අමාරු නිසා වන්නටද පුළුවන


සමහර විට කොච්චර පණ්ඩිතමානි වන්නට දැඟලුවත් අපේ කස්ටිය තාමත් කොලෝනියල් මෙන්ටලිටි එකෙන් එලියට එන්නට බැරුව ඉන්නා නිසා වන්නටත් පුළුවන්ය.



Monday, January 30, 2017

නෝටි කොල්ලෙක් වෙන්න එපා රන්ජා...

මෙතුවක් කාලයකට ලොම් හැලුණු බල්ලෙකුට වඩා වැඩි සතෙක් නොහිටි මහජන පුස්තකාලය ළඟ අද සූ ගා සෙනගය.සාන්ත, පීතර, කරෝලිස්, බණ්ඩා, මැගිලින් , සිරියාවතී වගේම එකදාස් නමසිය අනූ පහෙන් පසුව ගෙයින් එලියට බැස්සේ නැති බබුන් සීයාත් එතනය. එවැනි නෙත්කළු , චිත්තාකර්ශනීය දසුනක් දැක දැක නොදැක්කා සේ යෑම ඕපාදූපයට දෙයියෙක් වෙන රොටියාට අකැප දෙයක් වන බැවින් රොටියා ද සින් සින් ගා පුස්තකාලය ලඟට ලෑන්ඩ් කළේය.
පුස්තකාලය නං වහලාය. ජනතාව පේළි ගැසී ඉන්නේ  රජයේ කාර්යාලයක් ඉදිරිපිටය. ඒ දුටු රොටියාට "හික්" ගෑවී, ඉස්මුරුත්තාවට වගේ ආවේය.වහා වහා රොටියාගේ පිහිටට ආවේ එකට පන්තියේ හිටි කිරිබණ්ඩාය.

කිරිබණ්ඩා: ඇයි බං ඉස්පොල්ලේ ගියාද?
රොටියා : දැන් හරි මචං. මොකෝ මේ පැත්තේ
කිරිබණ්ඩා: නෑ මචං මං මේ ඉඩමක පොඩි වැඩක් කරගන්න ආව


ඒ ඇසු රොටියාට කිරිබණ්ඩා ගැන පව් කියා සිතුනේය. කලකට පෙර රොටියාද ඉඩමක පොඩි වැඩක් කර ගන්න මේ ස්ථානයටම ආවා අද මෙන් මතකය.


කළු කමිසයක් හා සුදු කමිසයකින් සැරසී උන් අයෙකු එළියේ මේසයක් ළඟ වාඩි වී පත්තරක් බලමින් උන්නේය. ඒ මේසයේම පසෙක තව දෙන්නෙක් තේ හදමින් උන්නෝය. අවැසිතාව කියූ සැනින් පත්තර මහතා දකුණු අත දකුණට දික් කොට "අතනින් අහන්න " යයි කිවේය
"අතන"  තිබුනේ පිළිගැනීම් කවුන්ටරයක් වගේ එකක්ය. එතැන කීප දෙනෙකු උන් අතර රොටියා සිය අවැසිතාව දෙවන වරට කියූ සැනින් "සාරියක්" ඇඳගෙන උන් නෝනා කෙනෙක් "සමන්තට(ප්‍රියන්ත වගෙත් මතකය)" අඬගැසූ කල, සමන්ත හෝ ප්‍රියන්ත පැමිණි කල කිසිත් නොකියා "බලන්න" යයි පමණක් කීවාය.ඉතින් රොටියාට ඒ සමන්තට හෝ ප්‍රියන්තට සිය කාරිය තෙවන වරටත් කියන්නට සිද්ද උනේය. ඉක්බිතිව ඒ සමන්ත හෝ ප්‍රියන්ත ඒ වැඩේ සඳහා යායුත්තේ කා ලඟටදැයි "උපසේන" මහතාගෙන් විමසු අතර උපසේන මහතා කන්නාඩි කුට්ටම යටින් බැලූ කල රොටියා සිව්වෙනි වරටත් සිය කාරිය පැහැදිලි කළේය.
ඊළඟට මොහොතක් කල්පනා කල උපසේන මහතා "නාමලී" මිස්ව විමසු අතර ඇය සිය දරුවා ගෙන එන්නට ගිය බව කියවුනේය. ඊළඟට "ඉන්ද්‍රානි" මිස් අද වරුවක් නිවාඩුය. "කල්‍යාණි" හිසරදයක් හැදී නිදිය. අන්තිමට ජයග්‍රාහිකාව වුයේ "නන්දාවතී" මිස්ය.

කොරිඩෝ වලත් පුටු මේස දමාගෙන වැඩ කරන ජනතාව වැඩ කරති. විස්සක් ඉන්න පුළුවන් තැන පනහකටත් පොඩ්ඩක් වැඩියෙන් ඉන්නවාය. වැඩ කරන්නේ නං දෙතුන් දෙනෙක් විතරය.

පස්වෙනි වරටත් සිය අවශ්‍යතාව නන්දාවතී මිස් හමුවේ පැහැදිලි කල රොටියාට අවශ්‍ය උපදෙස් නොපමාව ලැබුනේය. අවසාන කාරිය ලෙස රොටියා අයත් ග්‍රාමසේවක වසමේ ග්‍රාමසේවක කාර්යාලයට යායුතු බවට දැනුම් දුන්නේය.ඒ සඳහා නැවතත් රොටියාව පත්තර මහතා වෙත යොමු කරන ලද්දේය.

මේ වන විට සුළු කාලකන්ණි බවක් දැනී තිබූ රොටියා අදාළ කාරිය පත්තර මහතාට හයවෙනි වරට විස්තර කළේය (පත්තර මහතා එය ඇසුවේ දෙවන වරටය). ඒ වනවිට තේ කෝප්පයක් එහෙම බි පොඩි කික් එකකින් උන්නු නිසා පත්තර මහතා පෙරට වඩා හිතවත් කමකින් රොටියා සමග කතා බහ කරන්නට යෙදුනේය. රොටියාගේ ලගිනස්තානය පිළිබඳව විස්තර එකක් නෑර ලබා ගත් ඒ මහතා, අදාළ ග්‍රාමසේවක කාර්යාලය තියෙන්නේ පන්සල ළඟ බව සහතික කොටම කිවේය.

සතුටු සිතින් පන්සල ළඟ ග්‍රාම නිලදාරී කාර්යාලයට ගිය රොටියා දැනගත්තේ මේ "ඉහල" වසමට අයත් කාර්යාලය බවය. එතනින් අසාගත් මග සලකුණු ඔස්සේ රොටියා වතුර ටැංකිය ළඟ පිහිටි ග්‍රාමසේවක කාර්යාලයට ගිය අතර, එතනින් කියවුනේ මෙය "පහල" එක බවත් රොටියා අයිති වන්නේ මැද එකට බවත්ය.

කොහොමින් කොහොමින් හරි වරුවක් නිවාඩු දමා "මේ පොඩි වැඩේ ඉවරයක්" කරන්න හිතා උන් රොටියාට එදා දවසම නිවාඩු දාන්න සිද්ද උනා වගේම ඊළඟ දවස වන විටත් පැවතුනු බරපතල අන්දුන් කුන්දුන් තත්වය නිසා ඒ දවසත් ලෙඩ නිවාඩු දාන්න සිද්ද උනේය

ඉතින් මේ   කිරිබණ්ඩා 
අද ඇවිත් ඉන්නේ රොටියා එදා කාපු පරිප්පුව පෝලිමේ ඉඳගෙන බෙදාගෙන කන්නය.මූ අම්බානෙක පව්ය

රොටියා: ඉතින් බන් මේ පොලින් වල ලැගගෙන ඉන්නේ නැතුව සෙනග නැති දවසක වරෙන්කො
කිරිබණ්ඩා:උඹ මගුලක් කතා කරනවා. මං සෙනග නැති දවස් කීයක් නං ආවද. උඹට කියන්න මට තාම ඉඩම තියෙන්නේ මොන වසමෙද කියල හොයාගන්න බැරි උනානේ
රොටියා: අද නං උඹට ඇතුලටවත් යන්න බැරි වෙයි මචං
කිරිබණ්ඩා:පිස්සු හැදෙයි. අද කී දෙනෙක් වැඩේ කරගෙන ගියාද. අද බැරි උනොත් නං සුම්මා තමයි
රොටිය: ඇයි බං. ඇමතිතුමා ඇවිල්ලද
කිරිබණ්ඩා: මගුලක් කියනවා. ඒ යකා චන්දෙන් පස්සේ ආගිය අතක් නෑ
රොටියා:එහෙනං අගමැති ඇවිත් ඇති
කිරිබණ්ඩා:ඇයි උඹ ඊයේ ප්‍රවෘත්ති බැලුවේ නැද්ද. මිනිහ රටෙත් නෑ
රොටියා:එහෙනං උඹ මෙහෙ වැඩක් කෙරෙන්නේ නෑ කියල පත්තරේ ලිපියක් දාන්න ඇති ටක්කෙටම. (නැත්තන් අපේ ජනාදිපති තුමාම එන්න විදියක් නෑනේ)
කිරිබණ්ඩා:පිස්සුද මචං. මෙතනින් ගිය මනුස්සයෙක් ආයෙත් විහිළුවටවත් මේකේ ලගින්න එයිද.
රොටියා: එහෙනං ඉතින් ඔෆිස් එකේ කට්ටිය දැන් හරියට වැඩේ කරනවා ඇති. හැමදාම මේවා එකවගේ තියෙන්නෙත් නෑනේ
කිරිබණ්ඩා:වැඩකරනවා නෙවෙයි බං. මුන් ටික අද ඉස්ට්‍රයික්. ඒ හින්ද මිනිස්සුන්ට ඔලුව බේරගෙන වැඩක් කරගෙන එන්න පුළුවන් දෙයියනේ කියල